شارب من بز أمه!

كتير أوي

بنسمع التعبير ده!

بنقوله عن أي واحد فتوة, صحته مساعداه!

الطبيعي ان كل مولود بيرضع من أمه!

طب ايه لزوم التعبير ده, مادام انه بينطبق ع الأغلبية؟

صورة زاي دي, وفيه غيرها تاني, ممكن تفسر وتجاوب!

.........

اللي فـ الصورة الملك أمنحتب التاني, أما كان لسة أمير, بيرضع من البقرة حتحور!

أمنحتب التاني, ابن تحتمس التالت, ورث أول وأكبر امبراطورية فـ تاريخ الكون, وحافظ عليها طول حياته, لحد ماورثها لإبنه تحتمس الرابع وحفيده أمنحتب التالت!

اللي يشيل مسئولية كبيرة زاي دي, ويبقا أدها وأدود, وموش بس يحافظ عليها, كمان يكبرها ويطورها!!! يبقا مفيش زايه, وأكيد عنده سبب بيميزه عن اي ملك تاني .. السبب بتلخصه الصورة: (شارب من بز أمه)!

البقرة حتحور, ربة أمومة .. وياسعده ويا هناه. اللي رئيسة الديوان تبقا أمه .. ابن الناظر يعني!

البقرة حتحور, ربة صحة وجمال .. شوفو بقا الرعاية اللي ياخدها ابن وزيرة الصحة!

البقرة حتحور, ربة حماية .. يبقا مين أد ابن وزيرة الدفاع؟

اللي يرضع من بز أم بالمواصفات دي كلها, وغيرها, يبقا ايه؟

-          جامد أوي, وماجبيتوش ولادة!

ده المعنا الأصلي للتعبير الشعبي: (شارب من بز أمه)!

.........

تسلمي يا مصر, وتسلم رموزك وتعابيرك .. لو ليا عمر تاني, أعيش العمر كله, أكتب مزاميرك!

النوة

المصريين كائنات صيفية ... طبيعي لأننا أفارقة, يعني شمسيين, صيفيين!

نشوف الماجناكارتا المصري (الأمثال الشعبية), وصفت البرد بـ ايه؟

-          الدفا عفا, والبرد لحاس القفا!

-          عروسة الشتا قردة, وعروسة الصيف وردة!

الشتا فـ مصر, ارتبط بالنوات, جمع (نوة)!

النوة, اسم مختصر لوصف هبة الريح, سوا كانت الريح دي مغبرة أو مرملة أو سخنة أو باردة!

الواقع بقا, ان اسكندرية حوطت ع الكلمة دي (نوة), وبقت من علاماتها, يعني كأن النوات إسكندراني!

لأن حياة الصيادين والمراكبية مرتبطة أوي بحركة النوات!

ونخلي بالنا, ان (النوات) غير (العروات)!

(النوات) مواسم لهبوب الريح .. (العروات) مواسم للزراعة!

قبل ما نقول مواعيد وأسامي أهم (النوات), خلونا نشوف جدرها اللغوي الهيروجليفي:

نو/ نوا/ نوت/ نوة = ريح/ نسيم!

واحنا بنقرا حروف الكلمة اللي فـ الصورة, نخلي بالنا ان مخصص الكلمة (شراع), والشراع لو جاي لوحده, ممكن يتقري (nwt) = نوت/ نوة!

يعني مناخدش اللي مكتوب فـ القواميس مسلمات, الخواجة كتر خيره عمل, انما احنا كمان نعمل اللي علينا!

..........

من ناحية تانية, الكلمة دي جدر لكلمة (نوة), انما فيه جدور تانية لنفس الكلمة, من نفس المرحلة, ومن مراحل الديموطيقي والقبطي .. الأهم ان الجدور دي كلها, تصاريف قديمة للجدر الأصلي, اسم نطرة السما (نوت/ نوة)!

..........

من يوم (23) كيهاك – 2:1 يناير – نوة راس السنة!

من يوم (1) طوبة - نص يناير – نوات الفيضة!

من يوم (7) طوبة – نص يناير – نوات الغطاس!

من يوم (15) برمهات – مارس – نوات العوة/ برد العجوزة!

من (11) بؤونة – يونيو – نوة النقطة!

من أول (1) هاتور – نوفمبر – نوات المكنسة!

..........

تسلمي يا مصر من عين حسادك .. يسلم نيلك وأهراماتك .. تسلم حتا نواتك!

نوبة

آدي كمان كلمة خاصة بالمصريين!

(نوبة), يعني مرة/ دور/ نصيب/ كوم/ مناوبة .. لخ!

-          معلهش النوبة دي, عشان خاطري!

-          كل واحد له (نوبة)!

ومنها (مناب):

-          أنا مخدتش منابي!

والفلاحين بيعدو أيام سيبان الماية فـ الترعة, عشان كل واحد يروي فـ (النوبة) بتاعته!

ومع اللاحقة (جي), تبقا (نبت-جي/ نبطشي)!

#بنتكلم_مصري

الكلمة ومعناها فـ الصورة, مش محتاجة شرح, من مرحلة الخط الهيروغليفي:

نوب = مرة/ دور/ كل واحد/ أي واحد!

الفازة أو الزهرية, بتتنطق (نو)!

............

عندنا أكتر من خمسة وتلاتين ألف كلمة, من جدور مرحلة الهيروغليفي, وكمان قواعد كلامنا كلها (224 قاعدة), يعني الألفاظ والقواعد, كلهم مصري .. محدش بقا يقول علا كلامنا (عامية/ دارجة)!

............

معلهش النوبادي .. سماح النوبادي .. كلامك يا مصر .. لك حبي وفؤادي!

لبنان

حتا اللبانيين ميعرفوش أصل اسم بلدهم!

والتفعيصة المنتشرة, انها تصريفة من اللبن!

..............

علاقة مصر بـ لبنان, قديمة أوي, وتلاقي اسمها داخل فـ صيغة من حكايات ايزيس وأوزوريس!

مصر كانت بتعين حاكم لـ لبنان, من أيام الملك (سنفرو) – أسرة رابعة!

لبنان جزء أساسي من معارك تحتمس ورمسيس, وتغريبة سنوحي!

.............

شوف بقا جدر كلمة (لبنان), من مرحلة الحرف الهيروغليفي:

رمنان/ لمنان = لبنان Lebanon

-          معناها ايه؟

-          رمنان/ لمنان = فم آمون/ حنك آمون/ البوء بتاع آمون  The mouth of Amon

..............

يعني حلاوة كلام اللبنانيين, خلت المصري القديم يوصفهم بأجمل حاجة عنده (آمون)!

..............

تصريف الحروف, بالشقلبة (تغيير الصوت), وباللخفنة (تبديل مكان الصوت), جزء أساسي من اللغة, أي لغة!

حرف الره بيتشقلب مع حرف اللام (كروبترا/ كلوبترا – بطريموس/ بطليموس – سومار/ صومال)!

كمان الميم والبه, طول الوقت بيتشقلبو مع بعض, حتا فـ كلام الشخص الواحد (جنب/ جمب)!

.............

عاوز تعرف؟ عاوز تفسر؟ .. الإجابة بسيطة أوي: إعرف مصر!

بخيت

اسم مصري صميم, وترجمته الحرفية = النزيه المحظوظ/ المستقيم صاحب الحظ!

شوفو انتو بقا تصاريف الإسم (بخت/ باخت/ بخيتة/ مبخوت/ مبخوتة .. لخ)!

#بنتكلم_مصري

جدر الإسم من مرحلة الحرف الهيروغليفي: 

بخيت = أسد  lion

فيه شخصية قديمة حقيقية, مقدسة, اسمها (بخيت/ باخت)!

أساطير (بخيت) و(باستت), من عهد الملك (أمنمحات الأول), بتحكي عن أسد أسطوري, بيحمي الأفق (العالم), بكل نزاهة واستقامة, وبيفتح الطريق للسيول, عشان تروي الصحاري, وفيه صيغة تانية لنفس الأسطورة مكتوبة فـ بربا سيتي الأول/ أبيدوس!

................

تجسيد صورة الملك فـ شكل أبو الهول, ادا للأسد وصف الملك فـ كل أدبيات العالم!

والحقيقة ان الملك جسد صفات النزاهة والإستقامة والتعالي عن الأمور الصغيرة بشكل الأسد!

.................

لازم نقرا ونفهم نصوص مصر من تاني!

ده حق الجيل اللي جاي, ع الجيل الأولاني!

بركة .. مبروك .. بركات

(بركة) و(مبروك) و(بركات), كانت أسامي جميلة!

 (بركة) و(مبروك) و(بركات), لسة فـ كلامنا صفة, للخير!

-          (بركة) انك جيت بالسلامة!

-          ألف ألف (مبروك)!

-          (بركاتك) بتهل علينا, بفانوس رمضان

#بنتكلم_مصري

صورة جدر (بركة) و(مبروك) و(بركات), من مرحلة الخط الهيروغليفي:

باراكا/ بركا/ بركة = خير/ هدية/ منحة/ نعمة!

................

تصاريف كتيرة من الجدر (باركا), , فـ كلامنا المصري, وكمان العربي والعبري, وغيرهم!

كان: وزير دفاع اسرائيل (ايهود باراك), ورئيس أمريكا (باراك أوباما), ورئيس مصر (مبارك)!

................

أسامي كتير, من رموز اللغة والهوية المصرية, كانت مالية حياتنا, وفجأة بقت نادرة أو معدومة!

الكلام والأسامي, اللي من رموز الهوية, زاي أي ثروة متهددة بالإنقراض, محتاجة حماية!

................

تحيات وسلامات و(بركات) .. لـ مصر أم الدنيا, أم الأمهات!

...............

وسلامو عليكو

بـس

من جواهر اللغة المصري (بس), والجواهر يعني القطع المميزة!

(بس), من الأدوات اللي وظفت أسامي النترو (المقدسين), لأنها وظفت اسم النتر (بس)!

زاي اسم النتر (حر/ حور), اللي بقا أداة ظرف مكان (فوق/ علا)!

وزاي اسم النتر (بتاح), اللي بشقلبة الحه مع العين, بقا أداة الإضافة (بتاع)!

................

(بس), بنستخدمها فـ كلامنا بأكتر من طريقة:

(بس), أداة فـ جملة الكفاية, زاي (فقط) فـ العربي, و(only) فـ الإنجليزي!

-          بس خلاص, سمع هوس!

(بس), أداة فـ جملة المتابعة, زاي (لكن) فـ العربي, و(but) فـ الإنجليزي!

-          بس قوللي أي حاجة يا حبيبي!

#بنتكلم_مصري

(بس) موجودة فـ الهيروغليفي بأكتر من شكل, اللي فـ الصورة دي أداة المتابعة:

بس = لو تقدر/ اذا تسمح  (if only)!

...............

(بس), بتزين كلامنا, وبتميزه!

...............

طوف وشوف, وسافر واتعلم ... (بس) مصر أمانة, بيها تتباها وعنها تتكلم!